#بوست_السهرة
#ابيع_بوكسري_لأول_مشتر_أت
-----------------------------------------------------
بعد مرور 84 يوم على اللقطة الابرز افريقيا للاهلي في العقد ، لسه لحد دلوقتي وكل ما اكون متضايق بفتح سجل البوم يوم القاضية واتفرج عليه كل ما احس "انني لست بخير"
النهاردة وبعد صلاة الجمعة وانا بقلب كده في ذكريات اليوم العظيم ده ، بلاقي قدامي الصورة دي واللي استوقفتني لاول مرة رغم اني شوفتها تقريبا 4000 مرة من 50 الف زاوية
لكن الرؤية هنا ولأول مرة مختلفة شوية
اللقطة عبارة عن محمد مجدي قفشة عريس الفرح ومتحوط ب 3لاعيبة وناشئ وفي 3 في الخلفية مش باينين منهم صاحب الاسيست واتنين لاعيبة قايمين بدور ديفيد شارل سمحون (عبدالغني واسلام جابر )
فيلا بينا نتكلم عن كل لاعيب منهم بالتفصيل
-----------------------------------------------------------
#محمد_مجدي_قفشة
صاحب الفرح وعريس الليلة وصاحب الفخفخينا والسداح مداح وكل شئ مباح اللي احنا عايشين فيه
قبل التسديدة دي كان مساهم مع الأهلي من ساعة ما جيه من بيراميدز في 25 جون في 43 مباراة، احرز 14 هدف صنع 11 هدف
في بطولة افريقيا ساهم في احراز 3 اهداف وعامل اسيستين
ال3 أهداف اللي سجلها في الشامبيونز ليج كل هدف منهم الاهلي كان خطوة مؤثرة وحاسمة في مشوار عودة البطولة الغائبة عن الاهلي من 7 سنين
#الهدف_الاول كان في ملعب الجوهرة الزرقاء وفي اجواء اقل ما توصف بأنها ارHابية بيحرز الهدف الاول للاهلي في تاريخه في الملعب ده وبيساهم في صعود الأهلي للادوار الاقصائية
#الهدف_الثاني هو الهدف الأول في مرمى الوداد المغربي في المغرب واللي فتح الطريق للاهلي للفوز ذهابا ايابا بنتيجة 5-1 وبيصعد الأهلي للمباراة النهائية
#الهدف_الثالث والأهم والأغلى هو هدف كل العصور ، وهدف حسم نهائي القرن اللي احنا شايفينه في الصورة ده
الاهلي اشترى قفشة من بيراميدز ب20 مليون جنيه قادما من بيراميدز لمدة 5 سنوات ، وبيتقاضي راتب سنوي قدره 6 مليون جنيه لأنه من "الفئة الثالثة" في الرواتب
محمد مجدي قفشة سنة 24 سنة ، وحاليا قيمته التسويقية علي موقع ترانسفير ماركت هي 1.5 مليون يورو ما يعادل تقريبا 28.5 مليون جنيه مصري
بسبب هدف قفشة في نهائي بطولة افريقيا الاهلي كسب 5 مليون دولار ، 2.5 مليون دولار جايزة بطولة افريقيا ، و2.5 مليون دولار جايزة برونزية كاس العالم للاندية
يعني قفشه اللي سعره سنويا 10 مليون جنيه (4 لبيراميدز و6 راتبه ) كسب الاهلي 78 مليون جنيه في موسم واحد
والله يا بلاش
مركز قفشة بعد كل ده هو لاعب 8.5 وبيتوظف احيانا انه لاعب رقم 10
بعد كل ده جماهير الاهلي مش راضيه عن اداء محمد مجدي قفشه وشايفه انه لسه مستواه مش علي قدر تيشرت النادي ، وفي محنكين منهم شايفين انه لا يصلح لارتداء تيشرت الاهلي من الاصل
لا تعليق ... بجد بجد لا تعليق (بصوت سومه العاشق)
-----------------------------------------------------------------
نيجي بقى للتلاته اللي محاصرينه في الخلفية وبيتفرجوا عليه وهو بيسند الكره بين فخده وبطنه وبيمرجح رجله علي طريقة الكابتن ماجد عشان يجيب القاضية
علي الشمال هتلاقي اسطورة الزمالك الورقية #اشرف_بنقلبي
من ساعة ما جيه الزمالك ساهم في احراز 28 هدف ، احرز 18 وعامل 10 اسيستات في 53 مباراة منهم 10 اهداف من ضربات جزاء رغم انه لاعب وينج
بن شرقي ساهم في دوري ابطال افريقيا في 8 اهداف
احرز 5 وعمل 3 اسيستات
ال8 دول منهم 4 قصاد بريميرو دو اجوستو بطل انجولا وزيسكو يونايتد الزامبي في دور المجموعات ، وهدف في الترجي ، وهدف في الرجاء في كازبلانكا ، وحسبوله الباصه اللي في جون المرحوم قبلها بنص دقيقة اسيست (اه والله )
القيمة التسويقية لبنشرقي 2.00 مليون يورو وبيتقاضي راتب سنوي من الزمالك 1.7 مليون دولار يعني حوالي 27 مليون جنيه مصري سنويا وعايز يرفعه ل45 مليون جنيه سنويا عشان اتخض وبرق كويس لما قفشه جاب الجون بعد ما خطف الكورة منه
محصلة عوائد الزمالك من وراه = صفر
اشرف بن شرقي 26 سنة
------------------------------------------------------------
اللاعب الثاني واللي بينفخ ده علي ايد قفشة اليمين هو اسطورة الترامادول في كل العصور ، قلب الاسد ، اول مصارع من الWWE يلعب كورة ، #طارق_قدرني
من ساعة انتقال #طارق_حامد للزمالك في موسم 2014 يعني من 7 سنين لحد دلوقتي وهو عامل احصائيات مرعبة كفيلة انها تدخله في قائمة ( اكثر لاعبي الوسط اضحاكا في التاريخ )
طارق حامد في 7 سنين لعبهم مع الزمالك احرز 5 اهداف وصنع 8 في 239 مباراة ( ولا حول ولا قوة الا بالله )
يعني طارق حامد في 7 مواسم مع الزمالك بيساهم في احراز 1.85 هدف سنويا ( بالله عليكم حد يمسك الضحك اللي بيجري عالحيطه هناك ده ليقع علي رقبته )
قلب الاسد حامد بيتقاضي سنويا 15 مليون جنيه مصري كأعلي لاعبي الزمالك المصريين راتبا في نادي الزمالك بعد لقطته الاشهر مع زعيم الخرارة وهو بيقوله (انا عايز اجدد ، بس قدرني ) ولسه في حاجه لمزيد من التقدير عشان يعرف يكسر قصبات وركب اكتر
15 مليون جنيه سنويا ومحصلة العوائد = صفر
طارق حامد 33 سنه
----------------------------------------------------------------------
التالت بقى البعييييد ده اللي بيتفرج على قفشه وهو بيسندها واللي عليه العين وعريس اليومين دول ، اللي الزملكاوية قرروا يضحوا بملابسهم الداخلية عشان بيخبط علي صدره كويس ، ابن تونس الخضراء الفر #فرجاني_ساسي
فرجاني ساسي لعب مع الزمالك من منذ انتقاله للزمالك 2018 - 2021 83 مباراة
احرز 15 وصنع 12 بمعدل مساهمة خرافي وهو 9 اهداف في السنة (يا بني اقفش الضحك اللي رمي نفسه في البلاعة ده هيزروط نفسه )
قيمة عقد فرجاني ساسي السنوية هي 1.45 مليون دولار سنويا ما يقرب من 23 مليون جنيه عشان يساهم في 9 اهداف في الموسم الواحد يعني الهدف الواحد بيبقي واقع عالزمالك بحوالي 2.5 مليون جنيه !!!
فرجاني ساسي مش عاجبه الكلام ده وعايز يرفع راتبه السنوي مع الزمالك ل40 مليون جنيه سنويا ، عشان يبقي الهدف الواحد ليه بقيمة 4.5 مليون جنيه ( الحق الضحك عشان بيربط الحبل علي رقبته ودا عبيط وممكن يموت نفسه )
المشكلة حاليا ان جماهير الزمالك قررت تساهم في الموضوع ده وعاملين اكبر حملة بيع لبوكسراتهم وفانلاتهم الداخلية عشان الفر يفضل موجود ويجدد عقده عشان بيخبط علي فانلته كويس وبيدي 5 الاف جنيه مكافاة للناشئين بعد ما بيفوزوا في اي ماتش
ابن النادي براباربارااااا رار ااااااااا
23 مليون جنيه سنويا هيترفعوا ل40 مليون بالبوكسرات اللي هتتباع وعوائد الزمالك = صفر
بس بيخبط عالفانلة بشكل ممتاز كما ينبغي ، واحنا بنشتري متعتنا ببوكسراتنا
فرجاني ساسي 28 سنة
----------------------------------------
من اللي فات ده كله نكتشف محمد مجدي قفشه ابو 6 مليون جنيه في السنة كان متحاوط ب60 مليون جنيه وهو بيجيب الهدف ابو 5 مليون دولار
لما الاهلي باع اللي ملوش بديل خرج علينا عتاولة الاعلام ينددوا بالعمله السوده اللي عملها الاهلي وان ازاي لاعب باهمية السعيد تفضل محدده بسقف الرواتب اللي انت حاطه واحنا في عصر الاحتراف وإدارة بخيلة تفكر بعقلية التمانينات وبلا بلا بلا بلا ....
في النهاية اللاعيبه ام 6 و7 مليون جنيه واللي اقصى واحد فيهم كفئه اولى بياخد 12 مليون جنيه للمصري و17 مليون جنيه للأجنبي مدخلين عوائد بطولات للاهلي في موسم واحد تتعدي ال120 مليون جنيه في 3 بطولات بس في موسم واحد
ضيف علي اللي فوق دول مثلا واحد زي #محمود_علاء صاحب اسيسيت القاضية لقفشه اللي بياخد 13 مليون جنيه في السنة عشان بيعرف يلعب ضربات جزاء كويس رغم ان الضحك بيعمل بيبي دم وهو بيتفرج علي ادائه الدفاعي واي مهاجم بجنيه ونص بيبعتوا يجيب شاي ام حسن جوا منطقة الجزاء
الاهلي باع عبدالله السعيد اهم صانع العاب مصري بعد ما جددله بساعه عشان لعب من ورا الاهلي ، وقال لرمضان صبحي اهم وينج مصري شاب قدامك ساعة تقرر معانا ولا بره ، وقال لأحمد فتحي اهم لاعب مصري جوكر في القرن ال21 قدامك 48 تقرر مصيرك واستفاد منه لاخر ثانيه في تعاقده
لكن فرجاني اللي بيلعب مكان قفشه وبيقدم ضحك من النوع المفتخر جماهير الزمالك قررت تضحي بلباساتها عشان يفضل في النادي ويبص من بعيد لبعيد على قفشه وهو بيمرجح رجله
بن شرقي الوينج الهداف اللي معدل تهديفه هو معدل لاعب مركز 8.5 عندنا هو اسطورة كل العصور عندهم رغم انه بياخد 5 اضعاف اللي بياخده قفشه عشان بيتخض وبيرق وهو بياخد الكورة من تحت رجله وبيجيب هدف التتويج بدوري ابطال افريقيا وبرونزية كاس العالم للاندية
طارق جرينتا اللي بينام كل ماتش عشان يا ولداه اكل النجيلة عالارض بينهج بياخد 15 مليون جنيه في الموسم عشان ينفخ ببوقه وقفشه بيغزله وبيشوط هدف الملايين والشهرة والعالمية
فلما تشوف النهارده الفرق بينا وبينهم ، والفرق بين ادارتنا وادراتهم وتاريخنا وتاريخهم ومبادئنا ومبادئهم تقوم حالا تغتسل وتتوضى وتصلي ركعتين شكر لله علي نعمة انك طلعت اهلاوي
#شير_من_فضلك
تعليقات
إرسال تعليق
لا تنسئ اضافة تعليق، شكراً لك