#بوست_السهرة
---------------------------------------------------
المغرور ديك يعتقد أن الشمس تشرق كل صباح لكي تستمتع بمهارته في الصياح
#مثل_ابطالي
--------------------------------------------------------------
امبارح وانا معدي بالصدفة عالتايم لاين كده لقيت العزيز اسلام مهدي منزل بوست بيقول فيه بتعملوا ايه في الشتا ؟!!
فانا رديت عليه وقلتله بشرب شاي ثم شاي فشاي وبعدين شاي ، فهو رد وقال ما بحبهوش
فانا قولتله ما بحبش غيره
اتفاجئت ان في احد المتابعين دخل ورد عليا وقالي : الصنايعية فرحانين بيك !!! (على اساس ان الشاي هو المشروب الرسمي للصنايعية )
فأنا الصراحة الكلمة حرقتني جدا فرديت عليه الرد الاتي :
على راسي الصنايعية واحد واحد ، كفاية ان ايديهم الخشنة يد يحبها الله ورسوله ، ورغم اني مهندس الا ان كل الصنايعية اللي شغالين معايا اصحابي ❤️
المهم انه يبقى متربي ، عشان في ناس بتبقى باينه هاي وهي قليلة الرباية
طبعا هو اتفاجئ من الرد بتاعي وقالي اني فهمته غلط وانه كان في يوم شغال صنايعي وما يقصدش السخرية منهم ، وانتهى الموضوع وانه حصل خير وانا رديت برضوا اني مقصدش حاجه بكلامي وحصل خير
لكن اللي استرعى انتباهي ان دي مش اول مرة تحصل او اول موقف اشوف فيه تنمر علي فئة معينة ، الفئة دي ممكن تكون فئة عاملة او مهنة او بلد او اي حاجه من العينة دي
وللاسف وبما اني عايش في الوسط ده ففي اوقات بتفلت مني نفس العبارات اللي بتكلم عليها بما اني عايش في نفس العقل الجمعي
-------------------------------------------------------------------
«من تكبر قصمه الله، وقال أخسا، فهو في أعين الناس صغير».
#المصطفى_صلى_الله_عليه_وسلم
-------------------------------------------------------------------
زود علي ده كمان فكرة (قولبة الاشياء ) اللي هي انك تعمل قالب معين وصفات ونمط معيشة مرصوص رص لو حدت عنه تتطرد شر طردة بره الطايفة دي
في فترة من الفترات وبعد ثورة يناير وظهور طائفة محدثي الثقافة ظهر قالب معين نمطي لشخصية المثقف ، القالب ده بيشمل انماط شكلية ظاهرة عليه ومجموعة عبارات معينة وقوالب بوستات وطريقة تصوير ولبس ونمط حياة لازم تعيشه عشان تبقى لا مؤاخذة "مثقف" .
بقيت كل يوم اصحى علي غيار الريق البس في 40 بوست عن اشخاص ب"يحتسوا القهوة " ، القهوة بتحتسى ما ينفعش تتشرب زي بقية المشاريب الوضيعة .
القهوة لو اتشربت بسكر يبقي خيانة العن من الخيانة الزوجية وخيانة الوطن وخيانة بروتس ليوليوس قيصر وخيانة بروميثوس وسيزيف لألهة الاوليمب .
الاهم من شرب القهوة هو الجو (الاوتموسفير بلغة المثقفين الجدد ) ، فالقهوة لازم تتشرب في الشرفة (لو قولت بلكونة يبقى يومك ازرق ) في وسط لسعات برد يناير وزخات المطر وبخار الماء يرتفع من منخريك (فتحات مناخيرك) ، ولازم في الخلفية يبقي صوت فيروز او منير ( لو ام كلثوم او نجاة يبقي لازم تغتسل وتنطق شهادة المثقفين عشان تخش في ملتهم من جديد )
لازم 180 الف صورة لفنجان القهوة وجنبه سلسلة المفاتيح وعلبة السجاير في خلفية blur لشرفة المنزل ، ومعاها مجموعة من الكلام المجعلص العميق تنين من عينة
(القهوه لمن يعرفها مثلي هي أن تصنعها بنفسك، لا أن تأتيك على طبق؛ لأن حامل الطبق هو حامل الكلام، والقهوة رفيقة السكون )
أو تديها واحده (من آداب شرب القهوة: استنشاق رائحتها، وتركها تداعب خلايا رأسك. ) ثم تختمها ببوست من عينة (القهوة أنثى سمراء مخلصة، وأنيقة. وَحْدَهُ فنْجَان القَهْوَة ما يَمْلك القُدرة على احْتواءِ الوَجَع.)
لازم يبقي في وجع ، لازم يبقي في الم ، ما ينفعش تكون بتشرب قهوة عادي من غير ما تكون الحياة خدتك فومين غسيل ومكواة وعصرتك التجارب عصرة الاهلي للزمالك في ماتش الستة .
يعني مثلا ما ينفعش تشرب القهوة وانت مصدع ، او وانت عايز تركز ، او مثلا تشربها عشان عايز تدفى او تطبق ، او تشربها عشان هي مفيش غيرها في البيت وجيبك انضف من طبق صيني
لازم لشارب القهوة عشان يصنف من فئة المثقفين انه يتغزل في القهوة اكتر ما اتغزل في مراته في فترة الخطوبة ، لازم كل نقطة تفضل تشعر فيها وتقول كلام عميق تقدمي بلغة عربية متقعرة ، وإلا هتبقى خنت القهوة ووجب اعدامك جلوسا على السبرتاية
وبقت ثلاثية القهوة ، الشتا ، منير او فيروز كابوس بيطاردني في كل حته
انا بعشق الشاي وما بحبش القهوة وما بشربهاش الا مضطرا ، بحب فيروز لكن بعشق ام كلثوم وما بطقش منير ويحسه انسان مفتعل مبالغ فيه ، بكره الشتا بكل تفاصيله وانماطه ولبسه وليله ونهاره
بالتالي انا كده بقيت صابئ كافر بالملة الثقافية الجديدة وبقى واجب نعتي باني انسان سطحي رجعي قشري (انسان قشرة مش جمبري يعني )
والالعن من " التنميط " الثقافي هي اللغة الجديدة واللي ظهرت عشان تبان انك مثقف فشخيولا وابن ناس تنين
------------------------------------------------------------------
كلما ارتفع الشريف تواضع ، و كلما ارتفع الوضيع تكبر
#مثل_عربي
-------------------------------------------------------------------
ايه الفكرة انك بدل ما تقول عجبني او جميل او حلو جدا تقول انا حبيت ؟!! 🤔🤔
ايه الفكرة انك بدل ما تقول لحد ربنا يكرمك او يجازيك خير تقوله ربنا يطبطب على روحك 🤔🤔🤔
ليه بدل ما تقول انا زعلان ، حزين متضايق تقول انا انطفيت ، هو انت لمبات فينوس الليد يا بني ؟!!! 🤔
ايه الفكرة في انك عشان تبان مثقف وبتقرا لاحمد مراد واحلام مستغانمي وبتحضر حفلات الساقية ومشترك في صفحة عمق لازم تبقى ممحون ومسهوك ومتخلف (مش مختلف) 😒😒
نقولهم يا جدعان ارحموا ابونا ، دا الواحد خد اول جمهورية قصة قصيرة ومقال وكتبنا مسلسلات قصيرة وشاركنا في اعداد مسرحيات كتابة واخراج وتمثيل واتربينا علي ايد العراب الدكتور احمد خالد توفيق و دكتور نبيل فاروق وقرينا امهات الكتب في الادب العالمي وكتب في مجالات والله ما تسمعوا عنها وعمر الواحد ما كان مدعي افاق زيكم كده
ليه لازم كل يوم اصطبح ببوستات المحن عن القهوة ، وكل يوم لازم احس انها قربت تبقى طقس عبادة والعياذ بالله عند البعض ؟!!!
ليه لازم صوت فيروز ومنير والمطر مع البرد اشوفهم في ام جملة مفيدة ؟!!!
يا جدعان انا بحب الشاي كشري تقيل ولازم يكون العروسه مش ليبتون ولا احمد تي
بحب فيروز بس ام كلثوم بالنسبة ليا رقم واحد
ما بطقشي محمد منير وبحسه مفتعل فشخ اداء وغناء وان كان صوته روعه
لا بطيق زاب ثروت لا كايروكي ومعتبر مروان بابلو سرسجي وعمرو حسن لا يفقه عن الشعر اكتر من فقهي بقيادة المكوكات الفضائية
هل انا كده اعتبر من الصاپئين بدين المثقفين الجدد ؟!! ، العالم الضحلة اللي السوشيال ميديا والفولورز عملالهم قيمة ولما تخش في نقاش لمدة ٣ دقايق مع واحد فيهم تكتشف انه اضحل من بلاعة مجاري
ما تتكلموا طبيعي يا جدعان واطلعوا شوية من عباءة الادعاء والافورة والمحن والتلزيق وجو ال❤️❤️❤️ وال😍😍😍 ويا كوكو ويا كائن الباندا ويا بنت قلبي ويا بنت ديك الحب
ما تحبوا طبيعي وتعجبوا طبيعي وتدعو ربكم طبيعي
انتوا عندكوا اعاقة في مخكم ولسانكم مثلا !!!!
---------------------------------------------------------------------
ما تكبر أحد إلا لنقص وجده في نفسه ، و لا تطاول أحد إلا لوهن أحسه من نفسه
#المأمون
---------------------------------------------------------------------
طبيعة شغلي تخليني احتك تقريبا بكل فئات الشعب من البياعين السريحة لمالكي الشركات المالتي ناشيونال ، ومن سكان العشوائيات لارباب القصور والكومباوندات
ساكن في منطقة تصنف انها من الاحياء الراقية في 6 أكتوبر ، شغال سنيور جرافيك ديزاينر ومسئول عن منطقة الشرق الأوسط في جامعة كامبريدج في سويسرا
لكن عمري في حياتي ما نسيت ولو للحظة خلفيتي الثقافية والاجتماعية ، جذوري الصعيدية واللي بفتخر بيها في كل مكان واني من محافظة قنا مركز فرشوط ، طفولتي وفترة مراهقتي وبداية شبابي لحد ما بقيت 18 سنة وانا عايش في امبابة في شارع المطار واللي بعتز بكل لحظة قضيتها فيها
ويوم ما فكرت اتجوز اتجوزت من الصعيد رغم اني عايش في وسط بنات من كل شكل ولون واكتر سماجة وتلزيق من ذباب الصيف
وانا بربي عيالي بربيهم بنفس الطريقة والاسلوب اللي اتربيت بيهم واللي الناس بيعتبروها دلوقتي اسلوب غلط في التربية ، الاسلوب اللي طلعني انسان سوي متربي بقدر الكبير والصغير وبحترم اللي اعرفه ومعرفهوش
ايام ما كان عندي عربية ما افتكرش اني اتصورت فيها صورة واحده ونزلتها ، واول صورة ليها نزلتها لما اتحرقت وقولت ربنا يعوضني عنها ، زي ما كل يوم الفيس يتحفني ببوستات ناس جوا عربياتها وهما لابسين ساعة حائط علي ايديهم والنظارة الشمس الريبان الاصلي عشان يقول للناس (ًصباح الخير) بطريقة (نحن أكثر منكم مالا واعز نفرا )
مش بقول اني انسان مثالي دانا فيا عبر الدنيا والاخرة واللي بستر ربنا مخلي الناس مش شايفه مني الا الجزء الكويس ، لكني احسب نفسي انسان سوي نفسا متزن عقلا الي حد كبير ، اتعلمت الادب والاخلاق والتواضع علي ايد ابويا وشربتهوملي امي بالمعلقة
ليه لازم اتريق علي خلق الله واسخر من خلق الله ، واسف علي مخلوقات الله واوزع رصيد كلاكيع وعقد وتربية من غير تربية علي الناس عشان اتصنف اني مثقف ولا كوول ولا فشيخ تنين وانسان مجنح يتم الاشارة ليه في كل مكان بايموشن wow 😮
اتعلمت اني ما اتكلمش عن عيالي قدام اللي ربنا ما رزقهوش ، ولا عن حاجه اشتريتها قدام محروم ، ولا عن انجازاتي قدام حد بيعاني من مرارة الفشل
اتعلمت انه كما قال المصطفى صلى الله علي وسلم (لا يدخل الجنة من كان في قلبه مثقال ذرة من كبر ) ، واتعلمت ان الكبر هو اللي طرد الشيطان من جنة الله وجعله من الملعونين المذمومين
الفرق بينك وبين الفقير مش شطارة منك عشان تتنطط عليه ، دا بس تقدير الهي عشان يشوف شكرك من بطرك للنعمة اللي انت فيها
الفرق بينك وبين الجاهل ان ربنا هيسألك انت عن علمك عملت بيه ايه ، مش عشان تتنطط بيه علي خلق الله وتحسسهم بجهلهم
الفرق بينك وبين اللي ساكن في عشة ، هو انا ربنا بيختبرك بنعمته زي ما بيختبره علي صبره
كون انك مثقف ، متعلم ، غني ، عايش في ليفل محترم ، بتشتغل شغلانة محترمة دا بيخليك مسئول ومسائل ، مش مدعاة للتفاخر والتبجح والتنطيط علي خلق الله
الرسول صلى الله عليه وسلم في نفس حديث الكبر سأله رجل فقال : (إنَّ الرَّجل يحبُّ أن يكون ثوبه حسنًا، ونعله حسنة؟
فرد عليه اشرف الخلق وخاتم المرسلين صلى الله عليه وسلم قائلا :
إنَّ اللَه جميل يحبُّ الجمال، الكبر: بطر الحقِّ وغمط النَّاس
بطر الحق هو جحوده ونكرانه ، وغمط الناس هو احتقارهم
فاياك اياك اياك تخسر جنتك بدنيتك ، تخسر دينك بفرعنة وتنطيط وسخرية ولو علي سبيل الميم والترول ، وهل يكب الناس علي وجوههم الا حصائد السنتهم
اتعاملوا طبيعي اتعاملوا عادي ، بلاش جنون الانتفاخ الذاتي وحالة التسلخ الفكري والانسلاخ الاخلاقي والخلقي والديني اللي بقينا كلنا عايشين فيه ده
وافتكروا قول الحق سبحانه وتعالي في سورة الإسراء
وَلَا تَمْشِ فِي الْأَرْضِ مَرَحًا ۖ إِنَّكَ لَن تَخْرِقَ الْأَرْضَ وَلَن تَبْلُغَ الْجِبَالَ طُولًا
#شارك
#شير
#وعي_الناس
تعليقات
إرسال تعليق
لا تنسئ اضافة تعليق، شكراً لك