#بوست_السهرة
-------------------------------------------------------
ابكِ كالنساء ملكا لم تحافظ عليه كالرجال
#عائشة_الحرة لولدها ابي عبدالله الصغير بعد سقوط الاندلس
-------------------------------------------------------
10 سنين
3650 يوم على الراجل اللي ورا عمر سليمان و تحية اللواء محسن الفنجري لأرواح الشهداء
اهو انا كل ما افتكر لحد دلوقتي التحية العسكرية للواء #محسن_الفنجري لأرواح الشهداء في يوم 11 فبراير بتجيلي موجة هيستيرية من الضحك المخلوط باصوات غير ارادية من مناخيري
وبستغرب لحد دلوقتي ازاي الاصبع الاوسط لليد اليمني لسيادة اللواء لم يتحرك ليصبح عموديا علي الشاشة ، لكن برضوا بقدمله العذر لأن صباعه مكنشي علي الشاشة ، وكان في حتة تانيه
وحسينا ولا زلنا حاسين بصباعه ولله الحمد
تقريبا فترة تاريخية وعظيمة انك تقعد 10 سنين حاسس بنفس الصباع في نفس المكان بنفس احساس اول يوم
عظيم يا سيادة اللواء ، يسلم صباعك
----------------------------------------------------------
كنت بسمع زمان مثل بيقوله نسوة شارعنا العواجيز في امبابة العزيزة وهو ( التغيير علي وساخة بيجيب تسلخات ) !!
مكنتش فاهم مين المعفن ده اللي ممكن يغير هدومه علي عفانته ، لكن بعد 10 سنين لم نعد نعاني من التسلخات ولكن دخلنا في مرحلة بتر الرجل لأن الجسم خلاص نتن
يا الهي انه حقا رائع 💞
------------------------------------------------------------
جالي واحد من اصدقائي اللي كانوا شايفينا نازلين نخرب البلد بعد 8 سنين من الثورة وبيقولي:
- قولي بقى كده ايه اللي عملته الثورة واستفتدوا ايه ما كنا مرتاحين وزي الفل
قولتله :
- لما يكون الواحد عنده سرطان ومطلوب يعمل عملية والا هيموت ، فالعملية تنجح والمريض يخف ، ولكن لأن المريض متخلف عقليا فبيرجع لعاداته القذرة القديمة واسوأ من الاول ، فالسرطان يهاجمه تاني ويبقي بين ايادي الله ، ساعتها لوم المريض ما تلومش العملية
العملية كانت وسيلة انقاذ ، لكن لأن الحمار بيفضل حمار فهو اللي رجع مرضه بنفسه
بس هو المره دي متكيف ومبسوط ومتقبل قدره
مش انت متكيف ومبسوط .... يا حمار ؟!!!!
فبهت و واسرها في نفسه
--------------------------------------------------------
انني أؤمن بحقي في الحرية، وحق بلادي في الحياة، وهذا الايمان اقوى من كل سلاح.
#عمر_المختار
--------------------------------------------------------
فاكر لحد دلوقتي وانا وابويا الله يرحمه بنتخانق مع بعض ومش عايزني اخرج من البيت ، وفاكر اني اقسمت لأول مره اني نازل حتى لو مش راجع البيت تاني
ابويا اللي كان من اول يوم بيكبر مع كل لحظة للناس في الميادين ، اللي شوفت في عيونه فرحه يمكن عمري ما شوفتها ، زيه زي اي اب خايف علي ابنه
فاكر امي وهي بتتناقش مع ابويا وبتقوله لازم ينزل ، ما هو مش احسن من اللي بينزلوا ، ودا دوره (ما كنا بنعملها بالدور عشان اللجان الشعبية ) ومستحيل هيقبل انه يقعد
فاكر ابويا وبصته ليا وهو بيسيبني انزل انا وابن عمي ، وفاكر اللحظة اللي نازل فيها من علي منزل الكوبري عند ماسبيرو وشايف اعلام مصر في كل حته اللي اكتشفت بعديها انها اعلام فلول نظام مبارك
فاكر لما دخلت الميدان وبعدين اتقفل علينا واشتغل فينا الضرب
24 ساعة روحي متعلقة جنبي وسط ارواح عماله بتطلع ، رصاصة بتعدي من جنب ودني وسامع صوتها بتلبس في صدر اللي ورايا ، خرطوش بيتضرب في فخدي وبقع علي الارض
مرحبا بكم من قلب الحدث الاعظم في الثورة
مرحبا بكم في #موقعة_الجمل
24 ساعة بين الحياة والموت والكر والفر ، بين الشاب اللي نط قدام عيني وجاب الحصان بالبلطجي اللي عليه ، كان ملتحي ولابس سويت شيرت احمر
تفتكر كان اخوان ؟!!!!
تخيل مكناش بنسأل السؤال ده ، يلا معلش ملحوقة
حقك عليا يا ابويا ، انت كنت صح
----------------------------------------------------------
ايه اللي يخليني اقول لخطيبتي – اللي بقت مراتي بعديها – ليلة جمعة الغضب لو مصحتنيش الصبح كل اللي بينا هيبقى خلص
هو الموضوع كان فارق ليه اوي معايا ؟!!
مش عارف والله ، بس بعد 10 سنين وانا بفتكر شكلي وانا بقولها الكلمة دي في التليفون وهي بتتصدم منها ، واني ممكن انهي حب الطفولة عشان مصحتنيش بضحك اوي علي نفسي
لو كنت عملت زي فيلم Men in Black 3 و عملت زي الكائن الفضائي ما عمل وشخصيتي الحالية راحت قابلت شخصيتي من 10 سنين أظن الحاجة الوحيدة اللي كانت هتعملها شخصيتي الحالية مع اللي في الماضي انها هترزعها كف خماسي عباسي اطرم فيه سناني واسفلت بيه قفايا
ما اصل انا خلاص وزي ما بيقول الاستاذ تامر حسني
( عرفت اللي فيها )
-------------------------------------------------------------
ليت لي قوة العواصف يا شعبي
فألقي إليك ثورة نفي
ليت لي قوة الأعاصير إن ضجت
فأدعوك للحياة بنفسي
#ابو_القاسم_الشابي
--------------------------------------------------------------
اذان المغرب من ميدان التحرير
بنصطف للصلاة واحنا كلنا مرهقين ومش شايفين قدامنا
المرتبه كانت حلم ، دش سخن دا امنية ، تقعد في مكان دافي دا كان محتاج مصباح علاء الدين
وفي الركعة التالته واحنا بنسلم بيبدأ بيان عمر سليمان ، وبيعلن تخليه عن منصب رئيس الجمهورية ، وكلف المجلس الاعلي للقوات المسلحة بادارة شئون البلاد ، والله الموفق والمستعان
صريخ وصويت وهيستريا فرح ، بنقوم بنحضن ناس احنا مش عارفين هما مين ، صوت بيرج الميدان ومبانيه ، هو تمثال طلعت حرب بيرقص ولا انا بيتهيألي ؟!!!
صاحبي اللي مرافقني في الميدان مش لاقيه رغم انه كان بيصلي جنبي ، بكلمه في التليفون وبصعوبه بسمعه ورغم ان المسافة بيننا لا تتعدي ال200 متر الا انه كان مستحيل اني اوصله
اصل الفرحة كانت اسطورية ، كانت فرحة افراج شعب من زنزانته بعد ما لبس البدلة الحمرا ، عهد حرية جديد بيبدأ
مصر لأول مرة بقت لينا
تفتكر كلمة تكليف المجلس الاعلى للقوات المسلحة بإدارة شئون البلاد ليها معنى ولا ملهاش ؟!!!
يا سيدي مش مشكلة ، أهو الميدان موجود وزي ما شيلنا مبارك نشيل غيره
صوت ضحكة رقيعة في الخلفية على صوت اغنية (صوت الحرية)
----------------------------------------------------
- يا بني انت مسافر ورايح فين وسايب عزا خالتك ؟!!
- معلش يا جدعان دي انتخابات الاعادة ولازم انزل احط صوتي في دايرتي
- يعني تسافر 1300 كيلو رايح جاي عشان تنتخب ، انت عبيط يا بني ؟!!
- لا مش عبيط يا حبيبي ، بس ده مستقبل بلد ، والصوت بيفرق ، ودي شهادة قدام ربنا سبحانه وتعالى
- وهترجع امتي ؟!!!
- هنزل احط صوتي وارجع بعد بكره ان شاء الله
- والله العظيم انت مجنون
------------------------------------------------------
- وانت دلوقتي بتعمل ايه ؟!
- بعمل عايش ، بعمل مصدق ، بعمل نفسي انه كله تمام وزي الفل ، انا اشتريتها خلاص
- اشتريت ايه ؟!
- دماغي يا عم ، اشتريت دماغي ، مش انت شايف ان الدنيا دلوقتي ماشيه صح ؟!!
- اه
- انت صح ، شوفت بسيطة ازاي ؟!!
- يعني بعت قضيتك ؟!!
- لا ما بعتهاش ، بس من الاخر السلعة اللي معايا ملهاش شاري ، فبقت انتيكه حلوة جميلة حاطهها في بيتي ببص عليها من وقت للتاني بتفكرني بذكريات حلوة .....بس بقت فونوغراف ... عارف الفونوغراف ؟!!
- مش ده البتاع اللي بيشغلوا عليه اسطوانات زمان ؟!!
- اسم الله عليك هو بالظبط ، تعرف بقى تجيبلي اسطوانة فونوغراف لمهرجان الدخلاوية ؟!!!
- انت عبيط ، لا طبعا
- بالظبط كده ، الفونوغراف ما يشغلش الدخلاوية ، يبقى اللي معايا ما يلزمكش وما يلزمش حد ...فهمت حاجه ؟!!
- لأ
- مش مهم ، المهم اننا كده ✊
---------------------------------------------------
يمكنك قتل الثوار لكن لا يمكنك قتل الثورة.
#المهاتما_غاندي
-----------------------------------------------------
صندوق كرتون من وقت للتاني كنت بفتحه وببص علي اللي فيه
بنطلون مخروم من عند الركبة من اثار الخرطوش ، غيار جرح عليه اثار ميكروكروم ودم ، اي دي عليه علم مصر ، تيشرت طابعه بايدي عليه 25 يناير ، باندانة علم مصر كنت بلبسها علي راسي ، تليفون نوكيا N70 ، كيس سكوتش منت فاضي ، علبة سجاير روثمانز ازرق ، ولاعه ، بلي خرطوش طلع من رجلي
دلوقتي بحاول افتكر مكانه مش لاقيه ، ممكن يكون ضاع ، او مستخبي او ذهب في عملية تنظيف خرقاء على رأي رفعت اسماعيل في ما وراء الطبيعة
المهم انه مش موجود ، او يمكن مخبي نفسه مني عشان مبقاش مناسب للوقت ، يمكن حاسس احساس ديناصور بيحاول يمشي في دريم بارك
ملوش مكان
-------------------------------------------------------------
- طب وانت ايه رأيك في البلد ؟!!!
- بص ربنا يولي من يصلح ومحدش عارف الخير فين والحمد لله علي نعمة الاسلام وان شاء الله والف الف مبروك
- انت بتقول ايه ؟!!!
- اتك عليه
------------------------------------------------------------
الثورة ليست بتفاحة تسقط عندما تنضج , عليك أنت أن تجبرها على السقوط
#تشي_جيفارا
------------------------------------------------------------
اوعي تفتكر اني جاي احبطك او اقولك مفيش فايده ، انت المفروض كبير وتعرف كده لوحدك
بس الصراحة جو اللطم والكربلائيات الشيعية وسياسة لطم الوش بالشباشب دي مش دماغي اصلا
ما تتوقعش مني اقولك وماذا بعد او انت المفروض تعمل ايه ؟!!!
انا لا هتحبس علشانك ولا هتحبس عشان خاطر حد ، انا شاري دماغي وعامل عليها تأمين ضد الهبل
عملنا ثورة ؟!!
اه عملنا ثورة ، ثورة جميلة ونضيفة وكانت كل احلامنا فيها اننا نخليها بلد واننا نبقي بني ادمين
ثورة كان كل شعاراتها وطلباتها مسلمات عند شعوب تانيه
يعني ايه عيش حرية عدالة اجتماعية
هو في حد ممكن يطلب انه ياكل ، انه يبقى حر ، انه يبقي علي قدم المساواة مع كل الناس ؟!!!
يعني ايه حد ادنى للاجور ؟!! ايه الكلام البايخ ده
مطلبتش حد يديني جنيه ، بس طلبت ان الجنيه اللي في جيبي يسترني ومحدش ياخده
لكن من الواضح ان الطلبات دي كانت احلام ، سراب بقيعة يحسبه الظمأن ماء ، واضح انها كانت كبيرة جدا لدرجة انهم استخسروها فينا
------------------------------------------------------
حين تعيق مجرى الدم في الشريان تكون السكتة، و حين تعيق مجرى الماء في النهر يكون الفيضان، و حين تعيق مستقبل شعب تكون الثورة.
#فيكتور_هوجو
-------------------------------------------------------
- طب وفي ذكرى الثورة تحب تقول ايه ؟!
- احب اقول خطبة اللمبي في اللي بالي بالك ( لا تنحرف ، ولو حد اداك بالجزمة بوس ايده شعر ودقن وفي النهاية احب اسمع اغنية (في كل شارع في بلادي صوت الحرية بينادي
- طب اتعلمنا ايه من الثورة ؟!
- اهو ده اوسخ سؤال ممكن تسألهولي ، انا اساسا كنت بكره فقرة ماذا نتعلم من هذا الدرس في كتاب القراءة ، واللي انا بتعلمه وبعرفه غير اللي انت بتتعلمه وتعرفه
- ازاي يعني ؟!!!
- يعني لما حكوا في المدرسة قصة علي بابا والاربعين حرامي والمدرس سألنا اتعلمنا ايه منها ، عملي استدعاء ولي أمر لما قولتله انهم مش اربعين حرامي وانهم واحد واربعين ، ولما سألني مين ال41 وقولتله انه علي بابا كان هيشخرلي ، ولما شرحتله وجهة نظري وانه حرامي سرق من حرامية كان هيديني 50 خرزانه علي ايدي
- انا مش فاهم انت عايز تقول ايه ؟!!
- يعني فكك من جو كتاب القراءة ده ، اللي انا اتعلمته ان الثورة بالظبط زي ما تخش تعمل حمام ، لازم تشد السيفون وراك والا هيجيب عليك دبان وقرف وممكن يخليك تسيب البيت وتمشي
اتعلمت ان نص ثورة يعني مقبرة للشعوب ، نص ثورة يعني بشيل الورم وبسيب السرطان ، نص ثورة يعني اللي حضرتك شايفه ده
- طب والحل ؟!!!
- الحل عند اللي عنده الحل ، عند رب العباد ، فمرحلة من مراحل مريض السرطان بتتمنى له الموت عشان يرتاح من العذاب اللي هو فيه ، وفي المرحلة دي مفيش أي أمل غير في رحمة ربنا سبحانه وتعالى بيه وانه يحصل معجزة
- بس زمن المعجزات انتهى ؟!!!
- كنت عارفك غبي وهتقول كده ، مين اللي قال ان زمن المعجزات انتهى ، مين اللي صدر الكليشيه ده وخلاه كأنه وحي سماوي ؟!!
كام مره شوفت ميت ربنا سبحانه وتعالى حياه
كام مرة شوفت دكتور قال لمريض ان ايامه في الدنيا معدودة فمات الدكتور وعاش المريض بعده سنين
كام مرة شوفت عربية اتقلبت وبقت عجينة صاج وتتفاجئ باللي جواها طالع مفيش عليه حتى اثر خربوش
- يعني انت شايف انها ملهاش الا معجزة ؟!!!
- الفكرة مش فكرة حدوث معجزة من عدمها ، الفكرة كلها هل أنت اصلا تستحق واهل ان ده يحصلك ، ولا الوحل اللي انت موحوله مناسب ليك واللي واضح وظاهر ان الحقبة المهزأة اللي احنا عايشينها دي بكل ما فيها مناسبة جدا للناس اللي عايشين فيها
احنا فسده ، خربانين ، السوس ناخرنا وجايب نخاع عضمنا ، شعب ال100 مليون فهلوي واللي بيلعبوا بالبيضه والحجر ، ما بنأمنش لبعض وبنخون بعض لدرجة اننا بنخون حكم البلاي ستيشن
شعب من الهلاهليه واللي بيشغلوا دماغهم علي بعض واللي لقمة عيشهم ممكن تخليهم يبيعوا لحمهم
صفارة تجمعنا وعصاية تفرقنا ، تكبير الدماغ عندنا من اركان الايمان ، شرا الدماغ الشوبينج المفضل لينا
- طب ما انت مشتري دماغك ؟!!
- انا اشتريت دماغي عشان ملقتش حاجه تانيه اشتريها ، ولما حاولت ابيع للناس اللي عندي اكتشفت ان بضاعتي ملهاش سوق
بقيت عامل زي اللي دخل بلد كل اللي فيها ماشيين علي ايدهم وبيسألوه هو انت ماشي مقلوب ليه ؟!!
ممشتش علي ايدي زيهم ، بس قررت اني مش همشي وسطيهم تاني
- طب وهتفضل كده كتير ؟!!!!
- اه ، لحد ما الاقي الناس بدأت تعرف وظايف اعضائها ، لما الاقيهم بياكلوا بايديهم وبيمشوا علي رجليهم مش العكس ، لما يعرفوا ان وظيفة الدماغ التفكير مش الهرش ، وان وظيفة المؤخرة الاخراج مش التفكير
لما كرامتك تعلى على معدتك ، لما مخك يبتدي يستوعب مصطلحات زي الحق والمساواة والعدل والخير زي ما مستوعب ان عيش نملة تاكل سكر وامشي جنب الحيط ويا نحلة لا تقرصيني ولا عايز منك عسل ومن خاف سلم
يوم ما يحصل ده هتلاقيني معاك
- تصدق انت جبتلي اكتئاب ، انت سودتها في وشي
- معلش يا حبيبي ، الدمل عشان ينضف لازم يتعصر لحد ما يطلع كل القيح والقرف اللي فيه ، ما يهمنيش انك تتوجع قد ما يهمني انك تخف
- طب والثورة ؟!!!
- حلم جميل وعشناه ، ودايما كل واقع كان في الأول حلم ، بس احنا لسه مكملين في الحلم لحد دلوقتي
- ودا كويس ولا وحش ؟!!
- الحلم هيفضل طول عمره حلم طول ما هو في دماغك وانت نايم ، بيبقى حقيقة لما تبتدي تصحى وتفوق وتاخد خطوة
- طب وايه الخطوة دي ؟!!
- انك تبطل تحلم ، انك تقوم تطس وشك بشوية ميه وتشوف كان فين الغلط وتعالجه ، ثورة 25 يناير هي فكرة كل حالم بواقع نضيف ، يختلف الاسم والمسمى وتبقى الفكرة
متأخذنيش لو نكدت عليك ، بس اكتر حاجه اتعلمتها في ال10 سنين اللي فاتوا ان البوس ما بيجيبش عيال ، واني اتعامل مع الحقايق وبس ، واني ابطل تنظير عمال علي بطال
- يعني الثورة ماتت ؟!!
- عمر الثورة ما بتموت ، الثورة جمرة نار شبه مطفية ، مستنية شوية هوا عشان تشتعل تاني
الثورة فكرة ، والفكرة ما بتموتش الا بموت صاحبها
في الميثيولوجيا الاغريقية #بروميثيوس لما سرق النار من الهة الاوليمب سرقها واداها للبشر ما خلهاش لنفسه ، ومنها صنعوا حضارتهم وتاريخهم
الثورة زي نار بروميثيوس ، علمها للناس وورثها لعيالك وربيهم عليها ، يمكن يحققوا اللي انت معرفتش تحققه
بروميثوس غضبت عليه الهة الاوليمب ، بس مرر النار للبشر
مررها وخلي كل الناس تعرف ان الحياة من غير نار حياة مقرفة ، ضحلة ، ضلمة وبارده ، يوم ما تعرف تعمل ده الحلم مش هيبقى حلم
- يعني ايه ؟!!!
- يعني زي ما قال ابو القاسم الشابي :
أذا الشعب يوما اراد الحياة فلا بد أن يستجيب القدر
ولا بـــــد لليـــل أن ينجلي. ولا بـــد للقيــد أن ينكسر
ومن لم يعانقه شوق الحياة. تبخـــر في جوها واندثر
فهمت ؟!!!
- فهمت
- اشوفك الذكرى الجاية ، لعل الله يحدث بعد ذلك امرا
- سلام يا صاحبي
--------------------------------------------------
ثورة المصريين لها إرادة . و إرادة المصريين باقية
#لقائلها
--------------------------------------------------
#شارك
#شير
#وعي_الناس
تعليقات
إرسال تعليق
لا تنسئ اضافة تعليق، شكراً لك