#بوست_السهرة
--------------------------------------------------------------------
الفرق بين الحكيم و الجاهل ، أن الاول يناقش في الرأي ، و الثاني يجادل في الحقائق
#لقائلها
--------------------------------------------------------------------
في رائعة الكاتبة البيلاروسية سفيتلانا أليكسييفيتش #صلاة_تشيرنوبل واللي اتقدمت في مسلسل صنف انه واحد من افضل 5 اعمال في التاريخ #تشيرنوبل وفي واحد من اكثر المشاهد عبقرية علي الاطلاق ، بيستمر مسئولي المفاعل النووي في الحزب الشيوعي في انكار وجود اي تسرب من المفاعل الاشعاعي وان التسرب لا يعدو كونه 2 او ال3 بيكريل وان كل شئ تحت السيطرة
طبعا في وجود الاف الضحايا والمشوهين بسبب النشاط الأشعاعي من المفاعل كان من المستحيل انكار الحقيقة إلى ما لا نهاية ، لكن بسبب التأخير الاف الارواح اتقبضت واتشوهت ، وملايين هيتشردوا وهيضيعوا زي ما هنعرف بعدين
بيقوم احد العلماء العسكريين اللي عندهم بعض العقل بادخال ناقلة جنود عسكرية بعد عزلها جوا الاراضي وفيها جهاز كشف الاشعاع
وكانت الكارثة......
الجهاز بيخرج عشان يعلن ان نسبة الاشعاع في اقرب منطقة اقتربت منها العربية وصلت 10 الاف بيكريل ، النشاط الاشعاعي جوا المفاعل وصل 24 الف بيكريل
لكن دول ممكن نعتبرهم مسئولين صغيرين رغم تسببهم في اكبر كارثة نووية حصلت في التاريخ الحديث
لكن ايه رأيك في مسئول حكومي اول في الحزب الشيوعي الحاكم ؟!!!
المسئول الحكومي #بوريس_شربينا نائب رئيس مجلس الوزراء في الاتحاد السوفيتي بيوصل من موسكو لتشيرنوبل في اوكرانيا علي متن طائرة هليكوبتر عسكرية ومعاه عالم الذرة السوفيتي #فاليري_ليغاسوف المفوض للتحقيق في الانفجار
فاليري بيشوف بفزع المفاعل من علي بعد 5 كيلو من الطيارة الهليكوبتر وبيشوف الضوء الازرق اللي بيعبر عن التأين الاشعاعي من المفاعل وان المفاعل على شفا كارثة ، في نفس الوقت اللي بيصر فيه المسئول الحكومي انه يقف فوق المفاعل عشان يتأكد بنفسه
فاليري بيصرخ في وشه وبيقوله انه مش محتاج يقرب اصلا من المفاعل لأن الضوء الازرق ده علميا بيعبر بوضوح ان في انفجار وتسرب رهيب في المفاعل ، لكن نائب رئيس مجلس الوزراء بيصر وبيأمر قائد الطيارة الهليكوبتر انه يروح
لحد ما فاليري ما بيهدده انه لو قرب كمان شوية هيموتوا في اقل من دقيقة
وهنا المسئول السوفيتي بيتراجع
وبعد سلاسل من الانكار وان كله تمام وزي الفل ، وبعد فضيحة عالمية وصلت ان التسرب الاشعاعي وصل لألمانيا بينتهي الموضوع بخساير بسيطة
ايه بقى هي الخساير البسيطة دي ؟!!
انفجار المفاعل فور وقوعه اتسبب بمصرع 31 من العاملين ورجال الإطفاء بالمحطة جراء تعرضهم مباشرة للإشعاع، واختلفت التقديرات حتى الآن بشأن العدد الحقيقي لضحايا كارثة تشيرنوبل
قدرت الأمم المتحدة عدد من قتلوا بسبب الحادث بأربعة آلاف شخص، وقالت السلطات الأوكرانية إن عدد الضحايا يبلغ ثمانية آلاف شخص.وشككت منظمات دولية أخرى في هذه الأرقام وتوقعت وفاة ما بين عشرة آلاف وأكثر من تسعين ألف شخص نتيجة إصابتهم بسرطان الغدة الدرقية المميت.
وتنبأت منظمة السلام الأخضر بوفاة 93 ألف شخص بسبب الإشعاعات الناشئة عن الحادث، وسجلت المنظمة الطبية الألمانية ضد الحرب النووية إصابة أربعة آلاف شخص في منطقة الحادث بسرطان الغدة الدرقية.
وذكرت المنظمة الألمانية أن المنطقة المحيطة بمفاعل تشرنوبل شهدت تصاعدا كبيرا في معدلات الإصابة بسرطان الغدة الدرقية أكثر من أي أنواع أخرى من السرطان ولا سيما بين من كانوا في سن 18 عاما وقت وقوع الكارثة
وأشارت إحصائية رسمية لوزارة الصحة الأوكرانية إلى إن 2.3 مليون من سكان البلاد ما زالوا يعانون حتى الآن بأشكال متفاوتة من الكارثة. كما تسببت حادثة مفاعل تشرنوبل في تلوث 1.4 مليون هكتار من الأراضي الزراعية في أوكرانيا وروسيا البيضاء بالإشعاعات الملوثة.
بس كله تمام ، وكله تحت السيطرة ، والحزب الشيوعي مبسوط منك يا فندم
-----------------------------------------------------------------
إن الفجور لا يكمن في الأفلام الإباحية بل في أن ثمة أناسا يموتون بيننا بسبب الجوع والحروب العبثية.
#خوسيه_ساراماغو
-----------------------------------------------------------------
جميل اوي موضوع ان وزارة الصحة بتعلن كل يوم انخفاض حالات الاصابة بكورونا في الوقت اللي الكوكب كله بيتفعص حرفيا من كم الاصايات المهولة اللي بتحصل فيه ودا الحقيقة بيدل على حاجه من اتنين :
#الأولى ان كورونا متقمص شخصية الاستاذة نانسي عجرم وبيسأل المصريين ويقولهم لو سألتك انت مصري تقولي اييييييهييه ، فيرد عليها ويقولها مصري ابن مصري وكل مصري الله عليه ، وهنا الفيروس عينيه بتدمع على خلفية من اهداف مصري في البرازيل و كان 2008 و 2010 وبيتكسف يأذينا
#التانية ان المصريين خلفة الفراعنة هازمي الهكسوس وداحري المغول وفاشخي الانجليز وناكحي بني sهيون فيهم سر غريب بعيدا عن الفول ومكونات الشلولو والشاي المغلي
السر الاصيل اللي جواهم والنيل اللي رواهم بيقدر يتغلب على اي محتل ، فمش هيقدر يتغلب على حتة فيروس حقير وضيع كلب ذليل بصوت بوشكاش اسمه كورونا
في الوقت اللي المصريين ماشيين يعطسوا ويكحوا وينفوا في وش بعض وواخدين بعض احضان مطارات في المترو والمواصلات والمولات ، السيدة #وزيرة_الصحة بتخرج علينا مرتدية الكمامة في حفل زفاف بأحد الفنادق محدش لابس فيه كمامة غيرها وبتبشرنا اننا بسر اغنية الست نانسي وبحق ما قهرنا المحتلين قربنا خلاص نقض نقهر كورونا ... وليس هناك ما يدعو للقلق اطلاقا
التقرير اليومي لوزارة الصحة اللي بيتناقص يوميا وكأنه ريتش اكاونت واحد لابس حظر من الفيس بنشوفه في نفس الوقت اللي بنشوف فيه لاعيبة الكرة اللي تقريبا عايشين في جو معقم وبيركبوا عربياتهم المكيفة المغلقة وهما رايحين التدريبات وبيتعملهم مسحة يوميا واحيانا مرتين في اليوم ، بيتصابوا بالعشره وال15 واحد في المرة الواحده وكأنهم فراخ ضربت فيهم فرة
في الوقت اللي الواحد بيفتح فيه الفيس عشان يلاقي قدامه علي الاقل ما لا يقل عن 40 نعي وفاة واكتر من 30 حالة اصابة بين اصدقاء الواحد اللي لا يتعدوا ال5000ـ وزارة الصحة ما زالت تبشرنا بانخفاض اعداد الاصابات والوفيات وكله تمام وتحت السيطرة
----------------------------------------------
زي كده بالظبط الناس اللي ماتت في العناية المركزة في الحسينية عشان مفيش اكسجين ، وزارة الصحة بتطلع بعديها وبتاخد اجراء عاجل لردع اللي صور الفيديو ، ويخرج علينا المسئولين ليعلنوا ان الاكسجين موجود ومتوفر وسخن وبسمسم ومفيش حد مات ، وان كل اللي حصل هو مؤامرة لتشوية وزارة الصحة وبث الرعب في نفوس المواطنين
انا فضلت متنح ومش مصدق ان ده رد الفعل الحكومي ، استنيت اقالات ومذبحة محاكمات لكل اللي اتسبب في الكارثة دي
لكن.........
كله طلع تمام ، كله طلع تحت السيطرة ، كله زي الفل
المهم انك تلبس الكمامة ، عشان لو ملبستهاش هتتغرم 50 جنيه وقتي ، بس عادي انك تمشي في الشارع تلاقي نص الناس مدلدله الكمامة علي دقنها
كله تمام كله زي الفل كله تحت السيطرة
بس الناس راكبه علي بعض ، والمستشفيات المنهارة اساسا كومبليت ، وعشان تعرف تتعالج يا محتاج ربنا يسترها عليك يا يكون معاك مبلغ من 5 اصفار ، والاعلام بيقوم بمفعول اوسخ من الهيروين واننا بومب وصحتنا جامده والتلوث اللي احنا عايشين فيه ده هو اللي نجاكم يا كلاب من كورونا
كله تمام وكله زي الفل وكله تحت السيطرة
بس احنا هنسيب الشعب الصبح يطحن ويتعدي من بعضه وهنقفل الورش بالليل كده علي 6 ونص 7 عشان الفيروس بيكون تعب ومحتاج يقيل شوية
كل اللي انا خايف منه بس ان سلسال الانجازات المصري يستمر والموضوع يبهوق منهم ويبتدي يعملوا ريفايف ويرجعولنا اللي ماتوا
-------------------------------------------------------------
يا حبيبي انت لست اكتر من مجرد رقم في دايرة بتنزلها وزارة الصحة ، رقم بدون اسم ، محدش لا يعرف عنك ولا عن اهلك ولا احلامك ولا طموحاتك حاجه
انت ملح الارض يا حبيبي ، انت اللي لو مت هينزل اسمك تحت عنوان رواية اريش ماريا بيمارك (كل شئ هادئ في الميدان الغربي ) لأنك مجرد ضحية واحده
فكك من كل اللي بتسمعه وبتشوفه وبيتقالك وصدق الواقع اللي انت عايشه وشايفه
احنا عايشين وسط فيروس متوحش وجايحة لا تبقي ولا تذر ، نسبة الاصابات رهيبة بشكل مرعب ، الأعراض اقل وطأة وعنف من الموجة اللي فاتت ، ولكن قياسا علي الارقام فالموضوع مرعب ومقلق وخطير
خاف علي نفسك واهلك بيتك وعيالك ، خاف علي نفسك واوعي تخرج من بيتك الا لضرورة قصوى وانت واخد اقصى اجراءت الاحتراز والوقاية
ارجوك خلي بالك من نفسك ، دا الاكسجين ما بقاش موجود والناس بتموت مخنوقه
سيب السيدة وزيرة الصحة تؤكد ان كل شئ تحت السيطرة ، والسيد وزير التربية والتعليم يعلن عن جدول الامتحانات واستمرار الدراسة ... لأن ان شاء الله نهاية كوكب الارض هتبقي علي ايد دولة سيادة الوزيرين دول
لما تفتح التلفزيون ما تصدقش الا حاجتين :
الاذان ونتيجة ماتش الاهلي
غير كده يا صاحبي اهرب من الدايرة البيضه والفونت الاحمر علي الخلفية الزرقا الخاصة بوزارة الصحة
اوعي تبقى مجرد رقم ، اوعى تبقي لاشئ من وجهة نظر اللي مش شايفينك ولا عارفين انت مين اصلا
خاف علي حياتك ، لأنك ما تملكش غيرها
#شارك
#شير
#وعي_الناس
تعليقات
إرسال تعليق
لا تنسئ اضافة تعليق، شكراً لك