#بوست_السهرة
-------------------------------------------------------
ينقسم الفاشلون إلى نصفين: هؤلاء الذين يفكرون ولا يعملون، وهؤلاء الذين يعملون ولا يفكرون أبداً#د_إبراهيم_الفقي
----------------------------------------------------------
امبارح زوجة لاعب الأهلي أحمد رمضان (بيكهام) نزلت ستوري عالانستجرام بعد مباراة الأهلي مع سونيديب النيجري
الاستوري دي كانت صورة لبيكهام وهو بيلعب رمية التماس اللي كانت بداية الهجمة اللي جيه منها هدف الفوز بقدم ديانح وكانت كاتبه عالصورة (Mr Assit ) 👏👏
بعد ما الصورة ما نزلت مباشرة فوجئت بإن كل الصفحات منزلة الصورة على سبيل التريقة والترول والساركازم وسيل من الهوخيههو على اللي كاتباه بدعوة ان رمية التماس كان في بعديها اربع باصات لحد ما تم احراز الهدف حتى ولو كان تكنيك تنفيذ رمية التماس الطويل هو اللي متسبب فيه
قعدت الصراحة ادور علي موطن الضحك والهخه في اللي هي كاتباه ، انا الصراحة ملقتش ، ايه المضحك في اللي بتقوله زوجة لزوجها علي سبيل التشجيع وشد الأزر وتعظيم الانتصارات حتى لو صغيره مفهمتش !!
---------------------------------------------------------------
هناك شخص واحد لم يذق طعم الفضل في حياته: إنه الرجل الذي يعيش بلا هدف.
#فريدريك_نيتشه
----------------------------------------------------------------
ازعم ان اغلب الناس اللي نزلت الصورة دي وضحكت عليها شباب دون ال20 سنة لسه ما ارتبطوش وفي وسط المسخرة اللي احنا عايشين فيها دي ما يعرفوش عن الارتباط الا انه :
#شاب روش فشخ من اللي بيرفعوا شعرهم بطريقة زعافة السقف ، مسقط بنطلونه لحد ما نص بوكسره يبان وبيتكلم كتير انه بيحب الوردي وبيكره الاسود
مع #بنت من المصابين بمتلازمة #السناب_شات واللي بتشوف فيها وشها عبارة عن درجات من البينك واللينسيز والبناطيل المخرقه الملتصقة علي الجسم وبتتكلم باكسنت معووج وكأنها في بدايات الاصابة بمتلازمة باركنسون (الشلل الرعاش ) عشان تبان انها كائن متطور فشخ مش من منطقة شعبية عادية او ابوها بيكح تراب عشان يستر جسمها بشوية الخرق البالية دي
بيرتبطوا ببعض بعلاقة جسدية علي حسب نوع التربية سواء في الحلال او الحرام وبعد شوية يطلعوا يسبوا لبعض ميت ملة وربع لما يزهقوا من بعض ، مع بعض بوستات الشرشحة والتلقيح ثم ينتهي الموضوع بان كل واحد بيغير الRelationship بتاعته ويخليها complicated تمهيدا لأنها تبق SINGLE عشان تبدأ دورة الشقط من جديد
لكن محدش يعرف عن العلاقة دي علاقة السكن والرحمة والضهر والحيطة اللي بتتسند عليها والحضن اللي بتستخبى فيه سواء كنت راجل بشنبات واو بنت بضفيرة
زوجة بيكهام واللي حتى معرفش شكلها ايه ، طبقت ابسط مبادئ الارتباط والزواج وهو انك ضهر وسند اللي بتحبه ومرتبط بيه
بتشد من ازره ، بتشجعه ، وبتدفعه دايما لقدام ... بتعظم من اي انجاز عمله وبتهون عليه اي اخفاق او تراجع
بتوقفه علي رجليه لما يرجع من ورا ، وتصرخ من الفرحة مع اي خطوة جديدة بتاخدها لقدام
أحمد رمضان بيكهام شاب صغير مكملشي 21 سنة اتربى وعاش بين جدران اكبر نادي عربي وافريقي ومن اكبر الاندية اسما وصيتا في العالم ، فجأة وزي ما في 90 في الميه من الحالات لقى نفسه ما لوش مكان ولازم يدور علي فرصة جديدة في مكان جديد
بيبدأ في نادي صغير ملوش اسم او انجاز في الدوري الممتاز ملوش اي علاقة باسم وصيت المكان القديم الي فيه وبيبدأ رحلة تحدي جديدة يا يكون فيها قد التحدي ، يا هينتهي بيه الموضوع زي 95 في الميه من اللاعيبة موظف بيقبض على قد اللي بيعمله لحد ما الدنيا والناس تنساه
تألق في المكان اللي هو فيه رغم انه غير مركزه وستايل لعبه واتحول من #مجرد لاعب خرج من النادي الاهلي لواحد من اهم اللاعيبه الجوكر في مصر ، ومع الندرة وقلة كفاءة المتاح بقى هو واحد من اهم العناصر الاساسية في المنتخب الاوليمبي وعين ناديه القديم بدأت ترصده عشان يحل المشاكل الابدية اللي موجوده فيه ، لحد ما ناديه الاكبر والاشهر وبيته بيطلب يرجعه تاني
وبعد ما استغنى عنه ببلاش رجعه ب15 مليون جنيه
مش قصة كفاح عظيمة ولا حاجه لو قارنتها بملايين قصص الكفاح لشباب مصريين واسر تانيه بتكدح عشان لقمة العيش ، لكنها قصة نجاح وانتصار للنفس قبل اي حاجه وقومة من وقعة وتراجع
تفتكر بقى ان واحد زي بيكهام كان ممكن يحقق ده لوحده ؟!!!
بأي حال من الاحوال يمكن تصنيف ده من المستحيلات او علي الاقل حاجه صعبة جدا علي شاب في سنه وتفكيره
لكن تيجي هنا اللقطة الاهم والاحلى في المعادلة دي كلها
فكرة #المستر_اسيست
-----------------------------------------------------
في اول مرة اشتغلت فيها في حياتي كان تقريبا مرتبي لا يتعدي ال600 جنيه كنت ممكن في ايامي العادية اصرف اكتر منهم بس مصاريف شخصية
لكن لما ارتبطت بمراتي حاليا ونزلت اشتغلت وانا لسه طالب بدرس وخدت ال600 جنيه دول ، أمي وابويا حسسوني اني داخل البيت بربع مليون جنيه عليهم
عايزك تتخيل كده امي وهي بتقولي انها هتدخلني جمعية بجزء من المرتب ده عشان خاطر اجيب شبكة الخطوبة بتاعتي ، ومش عارف هتحوشلي ايه من فين عشان اوضب ايه في الشقة ، وبقت تشيلي منه جزء عشان تديهولي مصروف جيب ليا عشان اروح بيه الشغل
500 بند تقريبا امي وابويا وزعوا عليهم مرتبي اللي ما يكفيش حد سجاير وحسسوني بعظمة الانجاز اللي نزلت اعمله اني اضحي باجازتي الصيفية وانزل اشقى واتعب واعرق عشان خاطر اجيب فلوس
فلوسي دي ولا كانت تجيب لا شبكة ولا توضب شقة ولا تعمل اي حاجه ، وجوازي كله كان من فضل خير ابويا عليه رحمات الله تترى الي يوم الدين ، لكن التشجيع ولمعة العين دي وهما شايفينك بتاخد اول سكة الشقى والتعب خلتني اتنازل عن اوقات راحتي واشتغل اوفر تايم في مكاني لحد ما وصلت المرتب ده للضعف مره ونص
ابتسامة التشجيع اليومية وهما بيصحوني من النوم عشان ابدأ يوم عمل جديد ، والغدا اللي بيتسخن قبل ما اخش من باب البيت وغياري اللي متعلق في الحمام عشان اخوكم جاي تعبان من الشغل
دوافع كتير جدا وحماس وقوة بتاخدهم من لاشئ بتقدمه ليهم وشغلك ده لنفسك ، لكنه دفعه في ضهرك عشان تحس بقيمة اللي بتعمله فتعمل احسن منه
مراتي اللي كان بيعدي علينا ايام مفيش في جيبي مليم حالي حال اي شاب شغال شغل خاص وبتعدي عليه ايام الدنيا فيها بتقف ، وهي بتحاول تلم الدنيا وتقضي البيت بالمتاح قدامها ، وفي نفس الوقت بتهون عليك اللي انت فيه وتقولك دايما ان ربنا هيرزقك بالافضل والاحسن وانت مش عارف الغيب
ولما ربنا يكرمك وتنجح قيراط تخليهولك 24 قيراط ، ولو الدنيا فتحت عليك فدان تحسسك بأنها مزرعة
العلاقات ما بتبقاش دايما مثالية زي ما بحكي واكيد بيبقى فيها مشاكل ، لكن لما تتجاوز الفروع وتدور علي الجدر والاصل بتلاقي ان الاساس بيكون ده
زوجة بيكهام زوجة صالحة لجوزها ، عارفه هو عانى قد ايه وحرم ناس من ايه عشان يحاول يوصل للنجاح اللي هو وصله ، ولما وصله بقت بتعظم كل انتصار صغير بيعمله وتبروزهوله عشان يعمل انتصارات اكبر واكبر ويبقى احسن حد في الدنيا
انما الناس اللي طول الوقت عايشه علي ثقافة الترول والكوميك والسخرية من اي حاجه وأي حد حتى ولو من ابسط المشاعر الانسانية النبيلة زي انك تلاقي حد يحس بنجاحك اللي محدش شافه دا بقى السمه السايدة والطبع المقيت المقرف اللي بقى ملازم الجيل ده
اي حاجه قابله للسخرية وللكوميك والميم والترول والهويهخوو حتى ولو كان احساس واحده بجوزها ، حتى لو كان بوست من ام لابنها
اذا كانت السخرية دلوقتي بقت عيانا بيانا من المشاعر الدينية واسس العقيدة وثوابت الايمان وكتاب الله ووصلت البجاحة للذات الالهية في حد ذاتها ، فأيه يعني لما نترول ونهههه حبه على شوية مشاعر انسانية حتى لو انت هتأذي او هتدمر بني ادم بكلامك ده وانت نايم قرير العين كرضيع قربع ازازتين لبن بخيره
احترموا نفسكم وثمنوا المشاعر الانسانية ، وبلاش شغل الهطل والعبط والسخرية من كل حاجه عشان ترضي كائن العزب شو اللي موجود جوا نفسك
بلاش احساسك بانعدام النجاح او الفشل تعكسه في شكل كلاكيع نفسية وسواد وتسقطه علي اي حد بيحاول ينجح في اي حاجه مش حرام ، وقى معاه اللي يشجعه ويدفعه لقدام
دور علي ذاتك ونفسك في اي نجاح لأي حد وحاول تنجح زيه ، دور على حد يشد من أزرك ويقف في ضهرك ويزقك لقدام بدل ما انت ما مقضيها سنتحة وغتاته وتطفل علي مشاعر الناس
احترم خصوصيات الناس وكلامهم ومشاعرهم مع بعض ، مش لازم تفضل تتبع عورات الناس عشان تلاقي الميم والكوميك اللي هيخليك تهههههه عالناس عشان تحس برضا عن نفسك المريضة
دور في خلفيات النجاح ده واعرف ايه القصص اللي وراه ، ويوم ما تفكر ترتبط دور علي بنت الحلال اللي تطلعك لقدام وتقف في ضهرك ، وتشدك لو وقعت ، وتصقفلك لما تتقدم وتخليك ال Mr Assist
انما زمن ابو شعر زعافة وبنطلون مقطع وام بنطلون مخرق وشفايف مشفوطه بمكنسه وفلاتر سناب دا هيخليكم مسخ اسوأ من مسخ فرانكشتاين اللي كان عبارة عن تجميعة من جثث اموات حاولوا يخلوه بني ادم
كف عينك عن عورات الناس ، يخفى الله عن الناس عوراتك
#شارك
#شير
#وعي_الناس
تعليقات
إرسال تعليق
لا تنسئ اضافة تعليق، شكراً لك