#بوست_السهرة
#أسمه_أكرم
---------------------------------------------------------
يمكن في اوقات كتير وعلى سبيل القلش السخيف والضحك والتنمر بيتم وصف الشخص المدب او اللي بيعمل حاجه بشكل فج بأنه "فلاح" ، زي ما بيتم وصف الشخص المتعصب لرأيه اللي ما بيتفاهمش في افكارة بأنه "صعيدي"
وعلى الرغم ان النوع ده من الاوصاف المعنصرة شئ قمئ ومستهجن إلا أنه واقع موجود وبنشوفه وبنسمعه كل يوم
لحد ما جيه بكل حكاية النهاردة ، الفلاح البسيط ابو لغوة زي العسل وبقت الكلمة اللي بيقولها بلهجة بلده بتخش القلب بدون استئذان ، ويغير حتى مفهوم الضحك ويخلي كلمة " فلاح" مرادف لكلمة "دكر-بطل-مقاتل"
يعني من دلوقتي لو اتقالك يا "فلاح" ، افتكر اكرم وقول "فلاح وافتخر " ❤️
ايها السيدات والسادة ، إليكم اصغر من توج ببرونزية كأس العالم للأندية ، حفار نصف الملعب وكاسحة الالغام البشرية و الTerminator المصري ، ابن الشرقية القادم بسرعة الصاروخ المقاتل 💪 #أكرم_توفيق
--------------------------------------------------------------
يمكن بحكم جذوري الصعيدية فأهل الشرقية هم أقرب الناس لينا في وجه بحري عموما ، اسأل أي صعيدي عموما على المعلومة دي هتلاقي ان الشرقية بالذات بتتشابه مع الصعيد في حاجات كتير جدا في العادات والتقاليد والافكار والكرم ، والأهم فكرة أن الارض عرض
في وقت وجود الحملة الفرنسية في مصر فضلت اراضي اغلب اراضي الصعيد مستقلة تماما بره سيطرة نابليون تماما برغم شنهم اكتر من 40 حملة عسكرية على محافظات الصعيد وارتكابهم مجازر بشعة هناك ، لكن رغم كل ده فضل الصعيد خازوق دائم في ضهر نابليون لحد ما رحلوا عن مصر
الجنرال ديزيه قائد الحملات الفرنسية على الصعيد قال في مذكراته (إنى لا اكتمكم الحقيقة إننا لن نكون سادة هذه البلاد لأننا إذا أخلينا بلدة لحظة واحدة من الجنود عادت إلى حالتها القديمة».
برغم التفوق التسليحي والعسكري والتقني للحملة الفرنسية مقارنة بأسلحة الصعيد ، إلا ان كل ده مشكلش أي تأثير يذكر على اهل البلاد الجنوبية الي ان رجع المحتل بخفي حنين .
نفس القصة تقريبا اتكررت في الشرقية وفي واحده من اهم معاركها على الاطلاق (معركة الصالحية) استطاع الشراقوة بقيادة المماليك في إذاقة احفاد باريس الأمرين ، لكن في النهاية كان التفوق العسكري كاسح واستطاعوا السيطرة عليها بعد فرار المماليك.
جينات موجوده جوا كل مصري اصيل متربي في طين الأرض وفاهم يعني ايه الأرض عرض
---------------------------------------------------
"ايوه عشان خبطوه ، طيرته قولتله روح اقعد عالدكة عندنا ، كان جاي يتأرجز (يعمل اراجوز) وما اقولكوش اللي بيتأرجز عليا بعمل فيه ايه " ❤️🎵
كلمات تلقائية طلعت من بوق اكرم وهو نايم جنب محمود وحيد بعد معركة برونزية كأس العالم وبيوصف عمل ايه مع واحد من أقوى لاعبي الدفاع في أمريكا الجنوبية قاطبة البارجوياني #جوستافو_جوميز لاعب اي سي ميلان السابق لمجرد انه اتأرجز (اتنطط) بلغة اكرم على والتر بواليا واتسبب في جرح في وشه
كلمتين يلخصولك ببساطة فلسفة اكرم في الحياة ، انت مين؟ بتلعب فين ؟! تاريخك في الدنيا دي ايه ؟! يابا ما يهمنيش ، انت عورت صاحبي وانا هعلم عليك
اكرم بيخش في جوستافو جوميز بطريقة "كسر من غير ما تعور" ، دخله فنية بيطير فيها نجم الباراجواي بره الملعب من غير حتى الحكم ما يحذره ، وخلاه لحد اخر الماتش خايف يوصل لنص الملعب فأكرم يأرجزه تاني
لو المقال ده وصل لأكرم توفيق أظن انه ممكن لأول مرة يكتشف ان اللاعب اللي شلوحه جوه ارض الملعب ده كان في يوم نجم الروزينيري الايطالي اي سي ميلان ، لكن انا واثق انه لو كان كريستيانو رونالدو بذات نفسه فأكرم كان كفيل يرميه في المدرجات لو بص للشناوي بصة ما عجبتهوش 😂
------------------------------------------------------------
ايام زمان لما كنا بنلعب كرة ، كان يجي كوتش الفريق ويقولك الحتة دي شرفك واللي يعدي ادفنه فيها
دا في حجز كورة ساعتين بنلعب ماتش مفتوح على لاشئ الا مجرد متعة مع اصحابنا
كبر واحد منهم وبقى لاعب في النادي الأهلي ، لكن الفلسفة اللي كان بيلعب بيها لما كان عيل صغير بكاوتش باتا والشورت والفنلة ال adibas ، هي هي نفس الفلسفة وهو لابس تيشرت أحمر مكتوب عليه UMBRO وعليه شعار النادي الاهلي وستارز كورة تمنه رقم من 4 اصفار
اكرم في ماتش بالميراس على سبيل المثال تقريبا لعب في 4 اماكن ، برسم خطوط في الملعب هتلاقي ان كل مركز فيهم بتبقى منطقة كل مركز حوالي 8x8 متر
لعب قدام محمد هاني وبيقفل في ضهره لو اتقدم ، لعب مدافع تالت بين بدر وأيمن ، لعب هاف ديفندر 6 مع حمدي فتحي ، لعب هاف ديفندر 6.5 في حالة تقدم السولية وبيغطي في ضهره
بمجرد انتهاء المباراة وصد الشناوي لضربة الجزاء الاخيرة ، وفي فيديو من تصوير الجمهور خلف مرمي الشناوي ، بنلاقي عمال الملعب بينزلوا شايلين شوكة زراعية طويلة بيدخلوا فيها النجيلة اللي اتهربدت وخرجت من ارض الملعب عشان مباراة البايرن وتيجريس
اعزائي المشاهدين ، من هنا مر أكرم توفيق ورفيقه حمدي فتحي 💪
---------------------_-----------------_-----------
محمود وحيد بيسأل اكرم على احلامه فأكرم رد عليه وقاله :
حبة محشي ، يا سلاااااام وفرخه (بلغوة الشرقية ) فرخة (قالها باللغوة القاهرية ) محشية شوية رز، والجعدة مع الحاجه يا نهاااااار ابيض عالجعدة مع الحاجه ، الدنيا وما فيها ❤️
تخيل ان دي احلام لاعب لسه متوج ببرونزية كأس العالم للأندية ومدشمل نص لاعيبة فريق متوج بالكوباليبرتادوريس منهم نجوم دوليين في منتخب البرازيل ولاعيبة لعبت لاعرق الأندية الأوروبية
على راسي والله يا أكرم ، فوق راسي وجوه قلبي يا بني ❤️❤️
-------------------------------------
في وقت اكرم ما كان في الجونة وفي وسط تألقه اتسأل سؤال عن رغبة الاهلي في قطع اعارته واسترجاعه تاني للفريق
اكرم جاوب وقال : الأهلي بيتي وانا تحت أمره في اي وقت ، بس انا عايز وعد اني ابقى اساسي في الفرقة !!!
الجماهير كلها بلا استثناء وانا واحد منهم قطعناه ، انت مين اصلا عشان تطلع تتشرط على النادي وتقول انك عشان ترجع لازم تلعب اساسي ، ان شالله عنك ما جيت
ليخرج بعديها اكرم وهو تقريبا في نص جلده من الخوف وقال : انا مستحيل اتشرط علي فريقي وبيتي واللي لحم كتافي من خيره ، كل الموضوع اني بقول اني الاقي نفسي في الفريق لما اكون متألق مش مستبعد بدون اي اسباب زي ما كان بيحصل قبل كده ، لكن الاهلي لو جابني وطلب مني ابقى عامل في النادي هوافق بدون شرط
وكان قصده على فترة قاتل النجوم والمواهب ، صاحب فكرة "لازم تتأقلم 6 سنين عشان تبقى مؤهل تقعد دكة " ، مبتكر بالونة اللي ملوش بديل المدير الفني لمنتخب مصر #حسام_البدري
كنت فاكر ساعتها ان اكرم بيلحق نفسه من غضب الجمهور اللي كان فعليا هيفتك بيه وهيحطه علي القوايم السوده ، لكن بعد اللايف بتاعه مع محمود وحيد الناس اتأكدت انها بتتكلم مع بني ادم قلبه ابيض من اللبن وعلي سجيته وملوش في الملاوعة
اكرم اللي كل امله في الدنيا انه يفضل في حضن امه وياكل من ايديها محشي وفراخ وشوربة ، هو اللاعب اللي بتشوف الانستجرام بتاعه في كم ادعية واذكار وايات قرأنية ودعاة اكتر من صوره الشخصية ، اللي بتشوفه في وسط الماتش بيقوم وبمنتهي الخشوع وبيصلي ورا الدكه
هو هو نفس الاسد والتنين المجنح اللي بياكل ويفترس اي حد يقرب من ارضه ، اكرم اللي بيسيب علي كل لاعيب علامة زي علامة الاسد اللي بيسيبها علي اطراف الغابة عشان لو جيه اسد تاني يعرف ان المنطقة دي خاضعه تحت سيطرة اسد اقوى
اكرم كاسحة الغام ودبابة بشرية في وسط ملعب الأهلي ، لو بصيت علي حجمه بالمقارنه بحجم ديانج مثلا هتلاقيه تقريبا النص ، لكنه عنده قلب ورجولة وقوة تكفي لتحويل فار لديناصور ، مابالك لما تبقى اساسا علي انسان تكوينه تكوين اسد
احنا محظوظين بيك والله يا اكرم ❤️
0-------------------------------------------
اللي زي أكرم مش هتلاقيه في الاعلام كتير ، يعني مثلا مش هتلاقي كابتن سيف زاهر صاحب الشعر اللامع والبشرة اللي متاخده بالواكس مع الكثير من الماسكات وبدلته القادمة من باريس بيستقبل لاعيب بيقول (فرخه) بتفخيم الخاء ونفسه انها تبقى محشية رز
مش هتلاقي مثلا كابتن مدحت شلبي واللي وشه قرب يشقق من كتر عمليات الشد ورفع الجفون اللي بتضيق علي عينيه تدريجيا وبلهجتة وطريقته الانثوية وحركاته النسائية بيستقبل لاعيب اتولد وهو طالعله دقن وشنب وممكن يهفه كف يطرشه طقم سنانه
اكرم بعد ما يعتزل كمان 15 سنه ان شاء الله ، مش هتلاقي ليه كرسي محجوز في احد برامج التحليل والفقع والهري الكروي لأنه مش زيه كابتن ميدو بيحاول ينطق كلمتين انجليزي كل 3 ثواني مع دفس كلمة صديقي زلاتان واياكس وروما وتوتنهام في كل جملة عشان يداري قدراته الفنية الملط في التحليل والتدريب ، مش هيعرف يقول ( انه يطلب الكرة انه يطلبها بشدة ، اعطيه الكرة )
مش هتلاقيه عامل برنامج مثلا بيركز فيه علي كلمة (الشادو سترايكر وانه بيطير الجناحات ويقطع علي القريبه - مهم يقطع عالقريبه " وانه كان لازم يشوط الكورة بنص صباع سن ضفر رجله الوراني عشان الكورة تعمل هاف سكرو وتروح في المنطقة 9 التي تهبط فيها الكائنات الفضائية في روزورويل
أكرم مش هيعرف يقول لا مينتاليتي ولا هيعرف يطلع في اعلان بيتكلم فيه عن منتج جديد موجه لطبقة معاها فلوس لأن اكرم لهجته فلاحي واقصي احلامه طبق شوربة وفرخه جنب الحاجه
لكن الاكيد والاهم واللي هيتخلد في التاريخ ، ان اكرم توفيق هيكتب اسمه بإذن الله كواحد من أهم لاعبي خط الوسط في تاريخ مصر وافريقيا ، هيجي الوقت اللي هيتبروز فيه اسمه في صفحة جوا كتاب مسبوق بصفحات فيها صور تريكة ووائل جمعة وبركات ومتعب
الفرخة مش الها وراك ، لكن اكرم أسد ايله مخالب وانياب ❤️
تعليقات
إرسال تعليق
لا تنسئ اضافة تعليق، شكراً لك